haradok.info

Информационный портал

Социальные сети:

Новости Городка Культура

09.04.2023 10:51

504 просмотра

0 комментариев

Дапоўнена.Велікодныя відэавіншаванні ад іерархаў, пачынаючы з віцебскага біскупа Буткевіча і Слова арцыбіскупа Юзафа Станеўскага

На святочныя дні Уваскрасення Пана некаторыя іерархі Каталіцкага Касцёла ў Беларусі падрыхтавалі свае віншавальныя відэазвароты да вернікаў. Дапоўнена: Віншаванне віцебскага біскупа Алега Буткевіча на Вялікдзень. Таксама Слова на Вялікдзень 2023 года «УВАСКРАСЕННЕ ЯК ШТОДЗЁННАЯ ПАДЗЕЯ» прамовіў арцыбіскуп Юзаф Станеўскі Мітрапаліт Мінска-Магілёўскі.

  • Віншаванне Старшыні Канферэнцыі Каталіцкіх Біскупаў у Беларусі біскупа Віцебскага Алега Буткевіча
  • «Не бойцеся! Ведаю, што вы шукаеце Езуса ўкрыжаванага. Яго тут няма, Ён уваскрос, як сказаў» (Мц 28, 5-6)

    Паважаныя браты і сёстры ў Хрысце, шаноўныя суайчыннікі!

    Напружанасць у міжлюдcкіх адносінах нярэдка абуджае пытанне светапогляду чалавека. Хто я, навошта жыву, які сэнс у тым, што адбываецца са мной і навокал, што мяне чакае ў будучым? Сярод гэтых пытанняў важнае месца займае пытанне існавання Найвышэйшай Сілы, Бога, у Якім чалавек нават інстынктыўна шукае паратунку і дапамогі ў вырашэнні тых ці іншых праблемаў. Як сцвердзіў у свой час Кардынал Юзаф Ратцынгер — Папа Бэнэдыкт ХVI, «у свеце без Бога мы застаёмся пазбаўленымі ісціны, а гэта значыць — рабамі» (Кард. Ю. Ратцынгер. «Новы спеў Пану» 1,4; 1990 г.).

    Хрысціянства не проста дае адказы на пытанні, звязаныя з існаваннем чалавека, яно мае ў сабе моц учыніць гэтае існаванне «Паўнатою жыцця» (пар. Ян 10, 10). І гэтая «поўня», гэты Божы «дастатак» крыецца менавіта ў Крыжовай Ахвяры і Уваскрасенні нашага Збаўцы Езуса Хрыста.

    Таму мы зноў з вялікай павагай, радасцю і надзеяй услухоўваемся ў словы Велікоднай Літургіі, якая абвяшчае перамогу Хрыста над грахом і смерцю. Разважаючы над падзеямі Вялікай Ночы і Раніцы, што надышла пасля яе, мы заўсёды можам знайсці ў іх сваё месца: ці ў шэрагу абыякавых мінакоў, ці ў кагорце перапалоханых жаўнераў, праплачаных, каб хлусіць пра нібыта выкрадзенае цела ўкрыжаванага за два дні раней Настаўніка з Назарэту, ці сярод жанчын і апосталаў, якія з захапленнем распавядаюць пра сваю сустрэчу з Уваскрослым Хрыстом.

    «Спакой вам!» (Лк 24,36). Гэтыя словы, якімі Уваскрослы Збаўца прывітаў у Велікодную Раніцу сваіх вучняў, Ён скіроўвае сёння таксама да нас! Да тых, хто яшчэ, магчыма, блукае ў цемры, але мае вялікае прагненне жыць у Божым святле, жыць у праўдзе, у свабодзе Божых дзяцей. Да тых, каго напаткалі хвароба, выгнанне, разлад у адносінах з бліжнімі, жыццёвая параза. Спакой вам!" Так напісана, што Месія павінен цярпець і ўваскрэснуць на трэці дзень з мёртвых, і ў Ягонае Імя павінна абвяшчацца пакаянне дзеля адпушчэння грахоў усім народам, пачынаючы ад Ерузалема. А вы — сведкі гэтага" (Лк 24,46-48).

    Так, мы сведкі гэтага, калі моцна трымаемся Хрыстовага Крыжа, калі не дазваляем нянавісці завалодаць нашым сэрцам, але прабачаем, як і Бог прабачае нам правіны нашыя. Калі шукаем праўду і паводле праўды імкнёмся жыць. Калі з вуснаў нашых не выходзіць ніякая нядобрая мова, а ў намерах і ўчынках нашых няма падману. Тады разам з Хрыстом мы становімся пераможцамі смерці і ўжо цяпер уваскрасаем з граху.

    Няхай Той, Хто вытрываў у выпрабаваннях і, прабачаючы людскі грэх, уваскрос з памерлых, прынясе кожнай вашай сям’і, усёй нашай Краіне і сучаснаму свету ласку прымірэння, згоды, спынення войнаў і супакою!

    Хрыстос Уваскрос! Сапраўды Уваскрос!

    + Алег Буткевіч
    Біскуп Віцебскі

    Паводле catholicnews.by


  • Віншаванне біскупа Пінскага Антонія Дзям’янкі
  • Віншаванне біскупа Гродзенскага Аляксандра Кашкевіча
  • Віншаванне Генеральнага вікарыя Мінска-Магілёўскай архідыяцэзіі біскупа Аляксандра Яшэўскага SDB
  • Віншаванне Апостальскага адміністратара для католікаў візантыйскага абраду ў Беларусі архімандрыта Сяргея Гаека

Арцыбіскуп Юзаф Станеўскі
Мітрапаліт Мінска-Магілёўскі

УВАСКРАСЕННЕ ЯК ШТОДЗЁННАЯ ПАДЗЕЯ

Слова на Вялікдзень 2023 года

Хрыстус Уваскрос! Сапраўды ўваскрос! Аллелюя!

«Уваскрасенне Хрыста — гэта сапраўдная надзея для свету. Гэта сіла пшанічнага зерня, моц любові, якая аддае сябе да канца і па-сапраўднаму абнаўляе свет» (Папа Францішак).

Глыбокапаважаныя святары, кансэкраваныя асобы, браты і сёстры!
Людзі добрай волі!

Падзяляю з вамі, як і кожны год, радасць Вялікадня — свята Уваскрасення Хрыста! Хрыстус Уваскрос! Сапраўды ўваскрос! Аллелюя!

Калі мы думаем пра ўваскрасенне Езуса Хрыста, наша ўяўленне перапоўнена вобразамі. Мы ўяўляем пустую магілу Хрыста, сямейны вялікодны стол, фарбаванкі, кулічы і іншыя пасхальныя атрыбуты.

Аднак тое, пра што мы часам забываем, можа быць самым важным: гэта наступствы ўваскрасення для нашага штодзённага жыцця. Уваскрасенне датычыцца не толькі несмяротнасці Хрыста і паразы сатаны.

Наступствы Уваскрасення, калі мы дазволім, могуць паўплываць на кожны наш жыццёвы выбар.

Ва ўрыўку з Евангелля, які чытаецца ў касцёлах у Велікодную нядзелю, апісваецца, як Марыя Магдалена, а таксама апосталы Пётр і Ян, спяшаюцца, нават пераходзяць на бег, калі даведваюцца, што магіла Хрыста пустая. Хрыстовае Уваскрасенне дае ім і ўсяму свету дынаміку духоўнага развіцця, якой ніколі яшчэ не было дагэтуль.

Мае дарагія, веруючымі людзьмі Уваскрасенне Хрыста не можа ўспрымацца толькі як прыгожая падзея з мінулага, паколькі ў такім выпадку гэта будуць толькі тэарэтычныя веды. Хрыстус запрашае нас перайсці ад тэорыі да практыкі.

Асабістая сустрэча з Езусам выводзіць нас з самаізаляцыі і дае імпульс дзяліцца вопытам сваёй веры.

Марыя Магдалена, якая прыйшла да магілы Хрыста, разумеючы, што адбываецца нешта незвычайнае, спяшаецца паведаміць пра гэта Пятру і «іншаму вучню» (пар. Ян 20, 2). Можна заўважыць, што вопыт сустрэчы з Уваскрослым выводзіць малады Касцёл з раз’яднанасці і збянтэжанасці, якая панавала пасля смерці Збаўцы на крыжы, да еднасці і мужнага вызнання веры.

У Вялікую суботу 16 красавіка 1927 года нарадзіўся будучы Папа Бэнэдыкт XVI, якога Пан паклікаў да сябе напрыканцы мінулага года. У кантэксце завяршэння яго зямнога жыцця асаблівым чынам гучаць словы гэтага Пантыфіка на ўрачыстасць Вялікадня: «З раніцы ўваскрасення ў свет прыходзіць новая крыніца надзеі; з гэтага дня пачынаецца нашае ўваскрасенне, таму што Вялікдзень — гэта не асобны момант гісторыі, але пачатак новага стану. Езус уваскрос з мёртвых не для таго, каб памяць пра Яго засталася жывой у сэрцах Яго вучняў, але каб Ён сам жыў у нас і каб мы ў Ім маглі ўжо цяпер паспытаць радасці вечнага жыцця» (Папа Бэнэдыкт XVI. Велікоднае пасланне, 12 красавіка 2009 года).

Браты і сёстры! Ва ўсіх нас ёсць жаданні, якія настолькі глыбокія, што мы з цяжкасцю іх распазнаем і рэдка выражаем, але ў нас заўсёды ёсць жаданне чагосьці большага: больш супакою, больш радасці і больш любові. І Бог хоча адказаць на гэтае нашае глыбокае жаданне большага, бо шукаючы любові і міласэрнасці, мы насамрэч шукаем самога Бога.

У кожным пакаленні ёсць вялікае мноства вернікаў, якія паверылі ў тое, што Хрыстус уваскрос, і пачалі глядзець на сваё жыццё Божымі вачыма.

Езус для іх стаў не стваральнікам якой-небудзь ідэалогіі ці палітычным лідарам, але асабістым сябрам, настаўнікам і лекарам душы. Так, як апосталы, мы можам сведчыць усяму свету, што Хрыстус сапраўды ўваскрос і дае ласку падымацца з грахоўных падзенняў.

Мае дарагія, унутры чалавека пастаянна адбываецца барацьба духоўнай цемры са святлом уваскрасення. Метафару гэтай барацьбы можна ўбачыць у тым, як евангеліст Ян апісвае абставіны ўваскрасення Хрыста.

Перадусім звернем увагу на тое, што Марыя Магдалена ідзе да магілы Езуса, «калі было яшчэ цёмна» (Ян 20, 1). Цемра панавала перад узыходам сонца, але таксама ноч была ў сэрцы і душы Марыі: цемра, звязаная з абставінамі смерці Езуса. Калі ж сонечнае святло рассейвае цемру, Марыя сустракае ўваскрослага Хрыста. Святло Уваскрослага рассейвае цемру нашых грахоў так, як рассеяла цемру ў душы Пятра, які тройчы адрокся ад свайго Настаўніка.

Браты і сёстры, пустая магіла Езуса з’яўляецца вобразам Касцёла, які аб’ядноўвае тых, хто паверыў ва ўваскрасенне.

Папа Францішак неаднойчы падкрэсліваў, што Езус не выключаў нікога і хацеў, каб Яго Касцёл быў домам для кожнага, а не толькі для выбраных: «Касцёл — гэта міласэрная маці, якая заўсёды шукае магчымасці дапамагчы і натхніць; нават перад сваімі дзецьмі, якія памыліліся і памыляюцца, ніколі не закрывае дзверы» (Папа Францішак. Прамова падчас Агульнай аўдыенцыі, 18 верасня 2013 года).

Адным са старажытных сімвалаў Хрыста з’яўляецца якар. Якар надзейна ўтрымлівае судна на месцы. Хрыстус падтрымлівае нас, калі хвалі жыцця разбіваюцца аб нас і мы пачынаем тануць. Месія ўмацоўвае нашую лучнасць з Богам Айцом у часы спакус і выпрабаванняў. Менавіта ўваскрослы Езус Хрыстус — і толькі Ён — робіць нас святымі і мудрымі. Гэта ўваскрослы Езус Хрыстус дае нам супакой. Гэта Ён дае нам сябе ў Эўхарыстыі. Ён адпускае нам грахі ў сакрамэнце споведзі і прамаўляе да нас праз Святое Пісанне і праз свой Касцёл. Бог не глядзіць вачыма: Бог глядзіць сэрцам, а Божая любоў аднолькавая для ўсіх, незалежна ад веравызнання. Нават калі хтосьці атэіст, любоў тая самая.

Дарагія браты і сёстры!

Няхай Вялікдзень прынясе кожнаму з нас новае жыццё, нягледзячы на тое, якія катастрафічныя падзеі адбываюцца ў свеце і ў нашым асабістым жыцці. Няхай гэтая пасхальная ўрачыстасць адкрые магілы страху, нянавісці, граху, клопатаў, цяжкасцей і напоўніць нас надзеяй.

Няхай Уваскрослы Хрыстус асвятляе сваім святлом усю цемру нашага жыцця, няхай прынясе нам надзею і спакой! Няхай Хрыстус сёння ўваскрэсне ў кожным з нас!

Дазволім Хрысту ўваскрасіць нас, будзем сведкамі і апосталамі Яго ўваскрасення і новага жыцця.

Гэтыя свае велікодныя пажаданні ўмацоўваю благаслаўленнем

у Імя Айца, † і Сына, і Духа Святога. Амэн.

Арцыбіскуп Юзаф Станеўскі
Мітрапаліт Мінска-Магілёўскі

Мінск, Вялікдзень 2023 г.

Фота Юзафа Станеўскага ілюстрацыйнае.

Паводле: Catholic.by

Последние новости