haradok.info

Информационный портал

Социальные сети:

Новости Городка Общество

04.04.2020 08:05

414 просмотров

0 комментариев

«Гэта так было нечакана, што ня дай Бог нікому так». Муж першай у Менску ахвяры каранавірусу распавядае

У Менску памерла 67-гадовая Вольга Дзеравянка, у якой тэст на каранавірус даў станоўчы вынік. Пра гэта карэспандэнту Свабоды сказаў яе муж Яўген Дзеравянка, які цяпер у 1-й клінічнай бальніцы.

Пра тое, што жонка заразілася каранавірусам, ён даведаўся пасьля яе сьмерці.

«Мая жонка наогул хварэла, былі праблемы з сардэчна-сасудзістай сыстэмай, дыябэт. 29 сакавіка яна адчувала сябе няважна, а ўначы паднялася тэмпэратура, было падазрэньне на пнэўманію. А днём прыйшла доктар і накіравала ў бальніцу, на хуткай яе адвезьлі. У лякарні яна была паўтара сутак. Менш як праз суткі яна трапіла ў рэанімацыю. І ў гадзіну ночы з аўторка на сераду яна памерла ў рэанімацыі. А потым мне паведамілі, што ў яе станоўчы тэст на каранавірус».

ГЛЯДЗІЦЕ ТАКСАМА:

Стала вядома пра першую ахвяру каранавірусу ў Менску

Яўген Дзеравянка кажа, што ніхто нікуды ня езьдзіў, перад гэтым жонка толькі схадзіла па рэцэпты да лекара ў паліклініку.

«А я езьдзіў на мэтро, аўтобусе, тралейбусе, таму хутчэй мне было гэта падлавіць. А магчыма, яна заразілася ў паліклініцы. Тут ёсьць пытаньні. Але наогул пандэмія, вось і ўсе справы».

А што напісалі лекары аб прычынах сьмерці жонкі?

«Яны ж таксама ня ведалі пра вынік тэсту, гэта пасьля сьмерці ўжо было. У дакумэнтах напісана, што сардэчная недастатковасьць, яе рэанімавалі, і ацёк лёгкіх. Але мяне запэўнівалі, што да гэтага вірусу яна ня мае дачыненьня. Потым ужо пра тэст даведаліся».

Сёньня нябожчыцу крэміравалі, кажа Яўген Дзеравянка, «без усялякіх староньніх».

«Агента я ўсё ж наняў».

Усё, што здарылася, для яго было «абсалютна нечаканым».

ГЛЯДЗІЦЕ ТАКСАМА:

«Ён змагаўся вельмі доўга». У Менску памёр яшчэ адзін пацыент з каранавірусам

«Калі яе прымалі ў бальніцу, у яе тэмпэратура ўпала да 37,1. Яна была вясёлая, пакуль здавала аналізы, пакуль яе афармлялі. Не пасьпявалі патэлефанаваць дачцэ, жартавалі. А ўжо праз паўтара сутак яе ня стала. Гэта так было нечакана, што ня дай бог нікому так».

Спадар Яўген згадвае, як апошні раз размаўляў з жонкай праз тэлефон, як яна на яго «крыху наляцела», што не прынёс кубачак з накрыўкай.

«Я думаю, яна проста была расстроеная, магчыма, сэрцайка прыхапіла. А потым я тэлефанаваў, але яна не здымала. Тады яна ўжо ў рэанімацыі была. Усё так хутка, проста».

Яўген Дзеравянка цяпер на карантыне ў лякарні як кантакт 1-га ўзроўню. Кажа, што адчувае сябе «больш-менш нармальна» і чакае вынікаў тэсту на каранавірус. Тэст робіцца трое сутак.

ГЛЯДЗІЦЕ ТАКСАМА:

За суткі ў Віцебску ад пнэўманіі памерлі дзьве жанчыны, адна зь іх мэдсястра

«У палаце тры чалавекі, умовы нармальныя, ёсьць гарачая вада, прыбіральня. Даюць пару нейкіх таблетак на дзень, а калі тэмпэратура, то парацэтамол».

У лякарню ён трапіў пасьля таго, як сталі вядомыя вынікі тэсту на каранавірус. Яму патэлефанавала загадчыца паліклінікі, паведаміла вынік тэсту і запрасіла на абсьледаваньне.

«Яна ўважліва праслухала лёгкія, памералі тэмпэратуру. Тэмпэратура была нармальная, лёгкія чыстыя — і пайшоў дахаты на хатні карантын. Але калі тэмпэратура паднялася, я выклікаў хуткую, і мяне забралі ў лякарню».

Яўген Дзеравянка кажа, што адчувае сябе нядрэнна, хоць тэмпэратура ёсьць. Яму 65 гадоў, працуе канцэртмайстрам ва Ўнівэрсытэце культуры і мастацтваў. Чакае, як выйдзе з друку зборнік яго аўтарскіх песень. Кажа, што мае яшчэ многа матэрыялу для новых зборнікаў і што студэнты любяць яго песьні.

ГЛЯДЗІЦЕ ТАКСАМА:

190 у Менску, яшчэ 50 у Менскай вобласьці, 89 у Віцебскай. Прызнаныя выпадкі COVID-19 па абласьцях

«Калі даведаўся пра каранавірус у жонкі, то ўсім аб’явіў. Усё пад кантролем, усе ведаюць, з кім сустракаўся, на працы. Тэлефануюць, пытаюцца, як і што. Але ж гэта вірус. Усе з напружаньнем чакаюць, калі аб’явяць вынік майго тэсту».

Тэст рабілі ў паліклініцы, але пакуль не патэлефанавалі пра вынік.

«Гэта ўжо трэці дзень. Гэта было ў сераду вечарам, як бралі там тэст, а сёньня ў нас пятніца. А тут ажно чатыры разы бралі мазкі з носа і горла. Відаць, каб ужо дакладна праверыць».

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

22 новыя адказы пра каранавірус ад Сусьветнай арганізацыі здароўя, мэдычных аўтарытэтаў і з найлепшай практыкі

Колькі чалавек з каранавірусам памерлі ў Беларусі

Пакуль вядома пра шэсьць выпадкаў сьмерці пацыентаў, інфікаваных новым каранавірусам (Мінздароўя, нагадаем, паведамляе пра 4 пацьверджаныя выпадкі).

  1. 73-гадовая пэнсыянэрка Аляксандра Чэпік, памерла ўвечары 30 сакавіка ў Віцебскім абласным клінічным спэцыялізаваным цэнтры (ВАКСЦ, былы чыгуначны шпіталь).​
  2. 75-гадовы актор Драматычнага тэатра імя Якуба Коласа Віктар Дашкевіч, памёр у ноч з 30 на 31 сакавіка ў ВАКСЦ.
  3. 70-гадовая настаўніца зь вёскі Новыя Доктаравічы (Менская вобласьць) Натальля А., памерла 1 красавіка ў Капыльскай цэнтральнай раённай бальніцы.
  4. 70-гадовы вайсковы пэнсіянэр Уладзімер Сідараў, памёр 2 красавіка ў ВАКСЦ.​
  5. 67-гадовая Вольга Дзеравянка, памерла 1 красавіка ў 2-й гарадзкой клінічнай лякарні Менску.
  6. 60-гадовы мянчук памёр у сталічным інфэкцыйным шпіталі 3 красавіка.

Пашырэньне каранавірусу ў сьвеце. Гадзіна за гадзінай

Яўген Дзеравянка кажа, што добра жыў з жонкай. Дарослыя дзеці паразьяжджаліся, жывуць асобна.

«Мы ўдвох, нам было добра. Вельмі цяжкая страта. Я яшчэ і не зразумеў».

https://www.svaboda.org/a/30529020.html

Алесь Дашчынскі

Последние новости