haradok.info

Информационный портал

Социальные сети:

Новости Городка Экономика

31.05.2020 09:12

463 просмотра

0 комментариев

Мэдыкі абвінавацілі кіраўніцтва ва ўтойваньні зьвестак пра каранавірус і ў недаплатах

Супрацоўнікі магілёўскай бальніцы хуткай дапамогі вінавацяць адміністрацыю ва ўтойваньні зьвестак пра хворых на каранавірус. Акрамя таго, патрабуюць выплаты абяцаных Лукашэнкам надбавак за працу ва ўмовах пандэміі каранавірусу. Тэкст звароту трапіў да Радыё Свабода.

У лякарні працуе 1500 супрацоўнікаў. Зварот да кіраўніцтва падтрымалі 93 зь іх. Падпісанты сьцьвярджаюць, што пасьля перадачы ліста кіраўніцтву многія пачалі адклікаць подпісы — пад ціскам адміністрацыі.

Чаго дамагаюцца мэдыкі:

  • Перастаць хаваць факты выяўленьня каранавіруснай інфэкцыі сярод пацыентаў і супрацоўнікаў лякарні.
  • Пачаць паважаць жыцьцё і здароўе сваіх супрацоўнікаў.
  • Арганізаваць збор і распаўсюд дадзеных па выяўленых пацыентах з COVID-19, якія знаходзіліся ў лякарні, былі абсьледаваныя, але ім было адмоўлена ў шпіталізацыі, альбо якія былі накіраваныя для лячэньня і шпіталізацыі ў профільныя стацыянары ў пэрыяд ад 1 красавіка 2020 году.
  • Пачаць выплаты супрацоўнікам, якія кантактавалі з пацыентамі з каранавіруснай інфэкцыяй.
  • Указаць, калі і ў якіх памерах супрацоўнікі аддзяленьняў пачнуць атрымліваць надбаўкі, гарантаваныя заканадаўчымі актамі. А ў выпадку адмовы даць абгрунтаваны адказ аб прычынах.
ГЛЯДЗІЦЕ ТАКСАМА:

Ужо звыш 40 тысяч выпадкаў. Афіцыйная статыстыка COVID-19 у Беларусі на 29 траўня

«Пра каранавірус у радзільні даведваемся ад калегаў. Начальства маўчыць»

Адкрыта гаварыць пра прэтэнзіі да кіраўніцтва лекары адмаўляюцца. Кажуць пра ціск з боку адміністрацыі ўстановы, у выніку чаго многія калегі ўжо адклікалі подпісы пад зваротам. Некаторыя цьвердзяць, што падпісвалі зварот, не прачытаўшы яго ўважліва, і цяпер пра тое шкадуюць.

Адмовіўся гаварыць і лекар, якога ў бальніцы лічаць ініцыятарам звароту. Гэта малады спэцыяліст, які трапіў у лякарню па разьмеркаваньні.

Радзільня Магілёўскай бальніцы хуткай дапамогі

У прыватных гутарках мэдыкі адзначаюць, што «апошняй кропляй, якая перапоўніла цярпеньне і вымусіла зьвярнуцца да адміністрацыі, стала сытуацыя з каранавірусам у радзільным аддзяленьні бальніцы хуткай дапамогі».

Паводле іх, на пачатку траўня ў радзільні выявілі першы выпадак захворваньня супрацоўніка на COVID-19. Калі пачалі правяраць ягоныя кантакты, выявілі яшчэ больш за дзясятак заражаных. Сярод хворых таксама былі цяжарныя ды тыя, што ўжо нарадзілі, але заставаліся ў лякарні. Суразмоўцы сьцьвярджаюць, што іх «цішком па адной вывозілі ў магілёўскую бальніцу № 1, якая на час пандэміі перапрафіляваная ў інфэкцыйны шпіталь».

«Пра гэтыя факты мы даведваліся ад калегаў, але не ад начальства. Яно ўтойвае такія зьвесткі. Такая сытуацыя застаецца і па сёньня. Так, баючыся быць заражанымі, мы працуем», — кажа на ўмовах ананімнасьці адзін з мэдыкаў.

Адміністрацыя бальніцы хуткай дапамогі: сытуацыя ў радзільні — унутраныя пытаньні

Старонкі са звароту з патрабаваньнямі супрацоўнікаў бальніцы да адміністрацыі

Пра тое, што каранавірусную інфэкцыю выявілі ў радзільні бальніцы хуткай дапамогі, Свабодзе паведамлялі і раней крыніцы з мэдычнага асяродзьдзя. 6 траўня галоўны ўрач гэтай бальніцы Павал Арахоўскі адмовіўся сустракацца з журналістам. У прыёмнай паведамілі, што кіраўнік лякарні «абмежаваў прыём у сувязі з эпідэміялягічнай сытуацыяй у цэлым у краіне».

«Па сытуацыі ў радзільні ніякіх камэнтароў даваць ня будзе ні журналістам, ні каму-небудзь яшчэ, бо гэта ўнутраныя пытаньні», — сказала сакратарка.

Са звароту супрацоўнікаў бальніцы да адміністрацыі

20 траўня інтэрнэт-выданьне Mogilev.online апублікавала ліст аднаго з чытачоў, які сьцьвярджаў, што многія з тамтэйшых парадзіх — кантакты першага ўзроўню і што ў іх бяруць абавязаньне выконваць па выпісцы правілы паводзін у самаізаляцыі. Разам з допісам чытач даслаў і падпісаныя дакумэнты.

29 траўня Павал Арахоўскі адказаў на тэлефоннае пытаньне карэспандэнта Свабоды пра зварот супрацоўнікаў: «Гэтую лухту нават камэнтаваць не хачу. Дзякуй, да пабачэньня».

Мэдыкі: даказаць працу з каранавіруснымі пацыентамі цяжка

Патрабаваньне аб выплаце надбавак падпісанты аргумэнтуюць Указам Лукашэнкі № 131 ад 16 красавіка 2020 году «Аб матэрыяльным стымуляваньні работнікаў аховы здароўя». А таксама пастановаю Міністэрства аховы здароўя ад 20 красавіка 2020 году № 40 «Аб вызначэньні пераліку інфэкцый, за працу ва ўмовах, зьвязаных зь якімі, вызначаная штомесячная надбаўка».

Прыёмны пакой бальніцы. Тут спачатку пачалі зьбіраць подпісы пад зваротам да адміністрацыі

У звароце адзначаецца, што «ў пэрыяд з 1 красавіка па 1 траўня ў лякарні было абсьледавана 72 пацыенты», якія накіроўваліся ў іншыя шпіталі гораду з рознымі рэсьпіраторнымі інфэкцыямі і пнэўманіямі.

«Але праз адсутнасьць зваротнай сувязі нам невядома, якой колькасьці быў выстаўлены дыягназ каранавірусная інфэкцыя, — гаворыцца ў звароце. — І, такім чынам, пэрсанал ня мае фізычнай магчымасьці даказаць факт каранавіруснай інфэкцыі».

Мэдыкі дадаюць, што немагчымасьць даказаць кантакт з пацыентам, хворым на COVID-19, не дае ім права разьлічваць на даплату.

Паводле іх, са сьнежня 2019 году ў сувязі зь пераглядам сыстэмы аплаты працы заробак лекара істотна зьменшыўся.

Мэдыкі сьцьвярджаюць, што разабрацца ў тым, як налічваюцца даплаты, няпроста. Згодна з прэзыдэнцкім указам № 131, сума выплат для розных груп мэдычных работнікаў, якія стала працуюць з «ковіднымі пацыентамі», вагаецца ад 1 да 4 тысяч рублёў. Для разавых кантактаў — свае формы разьлікаў.

Ліст Ігара Петрышэнкі, які не публікаваўся ў адкрытых крыніцах. Мэдыкі актыўна абмяркоўваюць яго ў закрытых карпаратыўных чатах

Намесьнік прэм’ер-міністра Ігар Петрышэнка ў лісьце ад 20 траўня міністру аховы здароўя Ўладзімеру Караніку, старшыням аблвыканкамаў і менскага гарвыканкаму адзначаў, што вызначэньне сумаў даплат мэдыкам — «зона пэрсанальнай адказнасьці кіраўнікоў канкрэтных арганізацый аховы здароўя і мясцовых органаў улады і Міністэрства аховы здароўя». Петрышэнка вінаваціў кіраўніцтва Мінздароўя і абласьцей у тым, што тыя не наладзілі сыстэмнай працы па рэалізацыі ўказу № 131.

«Падобны стан рэчаў недапушчальны, — абураецца Петрышэнка. — Прыміце вычарпальныя меры, каб пазьбегнуць сацыяльнай напружанасьці ў калектывах аховы здароўя».

Ён заклікаў урэгуляваць «праблемныя пытаньні» з даплатамі да канца траўня. «Мэдычныя работнікі павінны атрымаць выплаты», — настойвае намесьнік старшыні ўраду.

Кіраўнік абласной арганізацыі прафсаюзу: канфлікту ў бальніцы няма

Па словах мэдыкаў, 27 траўня адбыўся сход калектыву бальніцы хуткай дапамогі Магілёва, дзе начальнік абласнога ўпраўленьня аховы здароўя Аляксандар Старавойтаў заклікаў «больш нічога не пісаць і не падпісваць» і паабяцаў «цалкам выплаціць надбаўкі», як таго патрабуе прэзыдэнцкі ўказ «Аб матэрыяльным стымуляваньні работнікаў аховы здароўя».

Старшыня абласной арганізацыі Беларускага прафсаюзу работнікаў аховы здароўя Віктар Суслаў настойвае: у бальніцы няма канфлікту. Нагодай для гутаркі з калектывам сталі дзеяньні аднаго з работнікаў, які абяцаў калегам, што будзе «дамагацца выплат па працы з каранавіруснымі хворымі», і так зьбіраў подпісы. Гэты лекар на сход не прыйшоў, хоць канфэрэнц-заля была поўная ягоных калегаў.

Прыёмны пакой радзільні

«Я пагутарыў зь людзьмі. Дамовіліся, што буду мець больш шчыльныя зносіны з калектывам, каб высьветліць нейкія працоўныя моманты, — кажа Віктар Суслаў. — Ніхто не называў (сытуацыю ў бальніцы) канфліктам. Наадварот, казалі людзі, што будуць разьбірацца з гэтым лекарам, які напісаў адно, а на справе паслаў зусім іншую паперу».

Мэдыкі: «Ціск на тых, хто падпісаў зварот, абсалютна чаканы»

Мэдыкі кажуць, што іхныя прэтэнзіі кіраўніцтва ўспрыняло «надзвычай нэгатыўна», бо «баялася паўтарэньня сытуацыі, як у Бабруйску». Там супрацоўнікі станцыі хуткай дапамогі зьвярнуліся з калектыўным зваротам да Лукашэнкі наконт нявыплаты надбавак, а затым не дазволілі здымачнай групе БТ «здымаць прыгожую карцінку» пра тое, як сытуацыя выпраўляецца. Пазьней страціў пасаду кіраўнік станцыі.

«Кіраўніцтва лякарні ўбачыла, што падначаленыя могуць бараніць свае правы, і ад гэтага ім некамфортна», — падсумоўвае адзін з падпісантаў рэзананснага звароту.

Гэтая публікацыя падрыхтаваная з выкарыстаньнем інфармацыі БелаПАН.

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
ГЛЯДЗІЦЕ ТАКСАМА:

Як каранавірус пашыраецца ў сьвеце. ІНТЭРАКТЫЎНАЯ КАРТА

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​
  • https://www.svaboda.org/a/30641950.html


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Последние новости